Զախարյանը եռանդով, էներգիայով լի մարդ է. Արմեն Մովսիսյան

ՀՀԿ 15-րդ համագումարին ներկա է նաեւ էներգետիկայի եւ բնական պաշարների նախկին նախարար, ներկայումս Սերժ Սարգսյանի օգնական Արմեն Մովսիսյանը: Yerkir.am-ի խնդրանքով էներգետիկայի եւ բնական պաշարների գործող նախարարի աշխատանքը նա գնահատեց մեկ բառով' լավ...

Yerkir.am-ի դիտարկմանը, թե Զախարյանի տարիքը թույլ տալի՞ս է, որ եռանդով աշխատի, ինչի ակնկալիքն ունի գործող վարչապետը բոլորից, Արմեն Մովսիսյանը պատասխանեց. «Այո', շատ եռանդով մարդ է, էներգիայով լի»:

Մեր հարցին` գո՞հ է իր նոր պաշտոնից, Մովսիսյանը գլխով դրական նշան արեց: Իսկ թե դա պաշտոնի իջեցո՞ւմ է, ինչո՞վ է պայմանավորված դա, Մովսիսյանը նշեց. «Իսկ ո՞վ է ասել, որ ես պետք է  միշտ բարձր պաշտոնների լինեմ»: Հետո փորձեց խոսքը սրբագրել. «Դուք կարծում եմ, թե ես հիմա ավելի թո՞ւյլ եմ»: Նա ընդգծեց, որ կուսակցությունն ինչպես որոշել է, այնպես էլ ինքը վարվել է:

Ի դեպ, Մովսիսյանը չէր կրում ՀՀԿ-ի կրծքանշանը, ասաց, որ ընկերոջն է տվել: