Մեծ Բրիտանիայում ձախորդ կողոպտիչը խոստովանել է, որ իրեն պահել է ծայրաստիճան հիմար

27-ամյա ուելսցի Դին Սմիթը 2,5 տարվա ազատազրկման է դատապարտվել Barclays բանկի մասնաճյուղերից մեկը կողոպտելու «չափազանց ձախորդ» փորձ կատարելու համար: Խնդիրն այն է, որ կողոպուտից առաջ երիտասարդը բանկին հայտնել էր իր անձնական տվյալները:

Սմիթը գրանցվում էր բանկի՝ իր տանն ամենամոտ մասնաճյուղում, երբ տեսել է կանխիկ ֆունտ սթերլինգներով լեփ-լեցուն դրամարկղերը:

Բանկում գրանցվելուց կես ժամ անց Սմիթը ներխուժել է նույն մասնաճյուղ և թափահարել հացի դանակը՝ պահանջելով իրեն տալ դրամարկղում եղած փողը: Սակայն երիտասարդի սպառնալիքները որևէ տպավորություն չեն թողել բանկի աշխատակիցների վրա, ովքեր հրաժարվել են տալ փողը:

Ձերբակալվելուց հետո Սմիթը խոստովանել է, որ իրեն պահել է ծայրաստիճան հիմար: