Օլանդը եւս մեկ անգամ շեշտեց Հայոց ցեղասպանության ճանաչման անհրաժեշտությունը

Այսօր նախագահի նստավայրում Սերժ Սարգսյանի հետ համատեղ ասուլիսի ժամանակ Ֆրանսիայի նախագահ Ֆրանսուա Օլանդը, անդրադառնալով Հայոց ցեղասպանության ճանաչման հարցին, հայտարարեց, որ կա մեկ լուծում` Թուրքիայի կողմից Ցեղասպանության ճանաչումը:

«Արմենիա» հեռուստաընկերության լրագրողի հարցին ի պատասխան, թե չի՞ կարծում, որ եթե Թուրքիան իսկապես ցանկանում է կարգավորել Հայաստանի հետ հարաբերությունները, պետք է ընդամենը քաղաքական կամք դրսևորի և վավերացնի հայ-թուրքական արձանագրությունները, Օլանդը նախ անդրադարձավ Էրդողանի ապրիլքսանչորսյան հայտարարությանը, որի մասին հիշատակել էր լրագրողը, եւ ընդգծեց, որ սովորաբար միշտ փորձում է դրական տարրեր գտնել նման հայտարարություններում:

«Բայց, իհարկե, ես կենտրոնական հարցը համարում էի այն, որ այդ ջարդերը որակվեն իբրև ցեղասպանություն: Կա մեկ լուծում, և դա Ցեղասպանության ճանաչումն է»,- ասաց Ֆրանսիայի նախագահը: