Կառավարության անդամներն օլիգարխիայի դեմ պայքարը պետք է սկսեն հենց իրենցից. Արծվիկ Մինասյան

ԱԺ ՀՅԴ խմբակցության պատգամավոր Արծվիկ Մինասյանն առաջարկում է հիմա ավելի լուրջ գործով զբաղվել` թողնել, որ կառավարությունը ներկայացնի ծրագիրը, տեսնել՝ որքանով է այդ ծրագիրը մեր երկրի առջև ծառացած մարտահրավերներին ուղղված, որից հետո արդեն քննարկել նաև «անձանց, կառավարության անդամների կարողականությունը, հմտությունն ու դրանց համապատասխան նրանց կարողությունները»:

«Մենք մի իրավիճակում ենք գտնվում, որ անձին կարևորում ենք ծրագրերից: Սա ես չեմ համարում ճիշտ մոտեցում: Եեթե ծրագիրն իրատեսական լինի, նպատակային, թիրախային, դրանից հետո արդեն կբխի գնահատականը՝ արդյո՞ք անձն ունակ է, ի վիճակի է ծրագիր իրականացնել, այ դրանից հետո նոր կարող ենք խոսել կազմի վստահության մասին», -այսօր լրագրողների հետ զրույցում ասաց Մինասյանը:

ՀՅԴ-ական պատգամավորը բերեց հետևյալ օրինակը. «Եթե մենք խոսում ենք օլիգարխիայի դեմ պայքարի մասին, և եթե նույն կառավարության այն անդամները, ովքեր խոշոր բիզնեսի մեջ մասնակցություն ունեն, սկսեն իրենցից, նշանակում է` վստահություն էլ կձևավորվի, ու ծրագիրն էլ կյանքի կկոչվի: Եթե դրանք լինեն զուտ խոսքեր, բնականաբար, վստահություն էլ չի լինի»: