Միրկադիրովին կալանավորելու պատճառը նրա` Հայաստան կատարած այցերն են

Yerkir.am-ը տեղեկացրել էր, որ ադրբեջանական «Զերկալո» թերթի ստամբուլաբնակ լրագրող Ռաուֆ Միրկադիրովին Ստամբուլի օդանավակայանում, Բաքու մեկնելիս, կալանավորվել է, ապա արտաքսվել Թուրքիայից: Այժմ նա գտնվում է Ադրբեջանի ազգային անվտանգության նախարարության մեկուսարանում: Տեղեկացրել էինք նաև, որ լրագրողը մեղադրվում է «պետական դավաճանության» մեջ:

Այսօր ադրբեջանական ԱՊՊԱ գործակալությունը հայտնել է, որ ադրբեջանական «Ընդդեմ խոշտանգումների» հանձնաժողովի նախագահ Էլչին Բեհբութովը հայտարարել է, թե Միրկադիրովը մեղադրվում է «առանց պետության գիտության Հայաստան մեկնելու և այնտեղ մի շարք հանդիպումներ ունենալու համար»: Այս կապակցությամբ Բեհբութովը նշել է, որ Հայաստանն ու Ադրբեջանը գտնվում են պատերազմական իրավիճակում, և բնակցությունների լիազորություն ունեն միայն նախագահները: Հանձնաժողովի ղեկավարը վստահեցրել է, որ ինքը շուտով կհանդիպի Միրկադիրովի հետ: