Արթուր Բաղդասարյանի ասուլիսը կհստակեցնի ամեն ինչ

ՕԵԿ առաջնորդ Արթուր Բաղդասարյանի մամուլի ասուլիսը ուժի մեջ է և տեղի է ունենալու ապրիլի 25-ին, ինչպես այդ մասին ավելի վաղ հայտարարել էին ՕԵԿ-ական պատգամավոր Հեղինե Բիշարյանն ու ՕԵԿ խմբակցության ղեկավար Հովհաննես Մարգարյանը: Yerkir.am-ի հետ զրույցում դա հաստատեց ՕԵԿ մամուլի քարտուղար Արթուր Միսակյանը:

Նշենք, որ Արթուր Բաղդասարյանի ասուլիսի ժամանակ նա կպատասխանի բոլոր այն հարցերին, որոնք թերևս անպատասխան մնացին ՕԵԿ քաղխորհրդի նիստին հաջորդած` ՕԵԿ-ական պատգամավորների մամուլի ասուլիսի ժամանակ: Անպատասխան մնացին լրագողների այն հարցերը, թե ո՞ր դաշտում է գործելու ՕԵԿ-ը կոալիցիայից դուրս գալուց հետո, ի՞նչ աշխատանքի է անցնելու Արթուր Բաղդասարյանը,  ի՞նչ քաղաքական օրակարգով են այսուհետ շարժվելու և ինչ քաղաքականություն են որդեգրելու` կուտակային կենսաթոշակային օրենքի հետ կապված:

Մեր հարցին` ճի՞շտ են մամուլում շրջանառվող այն լուրերը, որ ՕԵԿ առաջնորդ Արթուր Բաղդասարյանը մեկնելու  է Մոսկվա` հանդիպելու ՌԴ անվտանգության քարտուղար Նիկոլայ Պատրուշևի հետ, Արթուր Միսակյանը պատասխանեց, որ նման տեղեկատվության դեռևս չի տիրապետում: