Արագածոտնի մարզում նույնպես ոչնչացել է ծիրանի, վաղահաս խաղողի ու կեռասի բերքը

Արագածոտնի մարզում եւս, որտեղ ծիրանենիները, վաղահաս խաղողն ու կեռասը բողբոջել էին, ցրտահարության պատճառով ամբողջ բերքը փչացել է. Yerkir.am-ին ասաց Արագածոտնի մարզպետ Սարգիս Սահակյանը:

Նա նշեց մարզի այն համայնքները, որոնք, արդեն իսկ հաստատ է, տուժել են ցրտահարությունից' Օշական, Սասունիկ, Ուջան, Արագածոտն, Եդեսիա... Հիմնական վնասը հասել է ծիրանին, վաղահաս խաղողին, կեռասին: Մյուս համայքններում վնասի չափերը ճշգրտվում են:

«Դեռեւս տվյալներ չկան, թե մարզում որքան ցանքատարածություն կամ տնկարք է վնասվել ցրտահարությունից: Ստեղծված հանձնաժողովն աշխատում է վնասի ամբողջ չափը բացահայտելու ուղղությամբ»,- ասաց Սարգիս Սահակյանը:

Ցրտահարության դեմ պայքարելու աշխատանքների առումով մարզպետը նշեց. «Ձյունը գալիս է, ցրտահարություն է,  ձյան դեմ ի՞նչ աշխատանքներ պետք է անել, որ վնասները շատ չլինեն: Ցրտահարություն է: Ո՞վ է ուզում, որ այդպես լինի...»:

Այնուհետեւ մարզպետը տեղեկացրեց, որ  այսօր առավոտյան ցրտահարության կապակցությամբ կառավարությունում քննարկում է հրավիրվել` վարչապետի գլխավորությամբ` որոշելու ցրտահարության հետեւանքների վերացման ուղղությամբ հետագա աշխատանքների ուղղություններն ու բնույթը: