Արամ Ա-ն ՄԱԿ-ին առաջարկում է ապազինել Քեսաբի շրջանը

Երեկ երեկոյան Մեծի Տանն Կիլիկիո Արամ Ա կաթողիկոսին զանգահարել է ՄԱԿ-ի գլխավոր քարտուղար Պան Գի Մունի քաղաքական հարցերով պատասխանատու Ջեֆրի Ֆելթմանը եւ Վեհափառին ՄԱԿ-ի մտահոգությունը հայտնել Քեսաբում ստեղծված իրավիճակի կապակցությամբ` ավելացնելով, որ ինքը հանդիպումներ է ունեցել սիրիական ճգնաժամի հարցով ՄԱԿ-ի եւ Արաբական պետությունների լիգայի հատուկ պատվիրակ Լահդար Բրահիմիի, նաեւ` ՄԱԿ-ում Հայաստանի եւ Թուրքիայի մշտական ներկայացուցիչների հետ:

Վեհափառ հայրապետը  շեշտել է թուրքական գործոնի ազդեցությունը: Նա առաջարկել է, որ ՄԱԿ-ը քննի Քեսաբի շրջանն ապազինելու հնարավորությունները: Ֆելթմանը կառուցողական է համարել Վեհափառի առաջարկը եւ խոստացել այդ ուղղությամբ խորհրդակցություններ ունենալ Բրահիմիի հետ: