Քանդակներ` գլամուրի եւ իսլամիզմի դեմ

Այսօր Նկարիչների միությունում բացվեց «Էմանացիա» խորագրով քանդակների ցուցահանդեսը: Ներկայացված էին 5 երիտասարդ քանդակագործների` Աշոտ Գևորգյանի, Գեղամ Աբրահամյանի, Սարգիս Բաբայանի, Գևորգ Թադևոսյանի եւ Արգիշտի Հարությունյանի աշխատանքները:

Yerkir.am-ի հետ զրույցում Գևորգ Թադևոսյանը նշեց, որ իրենցից յուրաքանչյուրը ներկայացրել է երեքական գործ:

«Քանդակները բրոնզից եւ քարից են /մարմար եւ բազալտ/: Ճիշտ է, քանդակներից յուրաքանչյուրն ինքնատիպ է, բայց դրանցում արտահայտված մտահոգությունը նույնն է` աշխարհընկալումը` դու աշխարհում եւ աշխարհը քո մեջ»,- ասաց նա:

Իսկ թե ինչու «Էմանացիա», Գեւորգյանը բացատրեց, որ ճառագայթման ամբողջ պրոցեսն է կոչվում էմանացիա, մթից դեպի լույսն եկող ամբողջ ընթացքը: «Էմանացիա է կոչվում վերեւից ներքեւ կապը, Սուրբ Հոգու ազդեցությունը մարդու վրա: Քանդակը նույնպես նման մի կապ է»,- ասաց նա:

Երիտասարդ քանդակագործ Գեղամ Աբրահամյանն էլ նշեց, որ ցուցահանդեսի խորագիրը պայմանական է, կարեւորը աշխատանքներն են: «Ավելի շատ օբյեկտներ են, քան քանդակներ: Մենք փորձում ենք պահպանել քանդակագործության ճիշտ ոճը, բայց ասելիքն այսօրվա է: Կարեւորը գեղագիտական ճաշակը բարձր պահելն է, որ գործերդ այսօրվա գլամուրային խոսքից դուրս լինեն»,- ընդգծեց նա:

Իսկ քանդակագործների ուսուցիչը` քանդակագործ Գարեգին Դավթյանը, նշեց, որ քանդակները գլամուրի եւ իսլամիզմի դեմ են: