Հովիկ Աբրահամյանը նմանություն տեսնո՞ւմ է Մարտի 1-ի եւ Ուկրաինայում տեղի ունեցած դեպքերի միջեւ

ԱԺ նախագահ Հովիկ Աբրահամյանը «շատ վատ» է գնահատում Ուկրաինայում տեղի ունեցող իրադարձությունները: Այսօր լրագրողների հետ զրույցում նա նշեց, որ շատ վատ է վերաբերվում այն բոլոր իրադարձություններին, որոնց ժամանակ լինում են մարդկային զոհեր:

Ինչ վերաբերում է հարցին՝ տեսնո՞ւմ է, արդյոք, նմանություններ 2008-ի մարտի 1-ին տեղի ունեցած իրադարձությունների հետ, ԱԺ նախագահը նշեց, որ չի ցանկանում համեմատություն անել Ուկրաինայում տեղի ունեցող իրադարձությունների հետ:

«Յուրաքանչյուր նման դեպք դժբախտություն եմ համարում տվյալ երկրի համար: Ամեն դեպքում` մենք պետք է լավ բաներից խոսենք, լավ բաներ մտածենք»,- ասաց ԱԺ նախագահը՝ չցանկանալով ներքաղաքական որևէ այլ հարցի պատասխանել` ասելով, որ կանխատեսումներ չի անում: