Լավրովի խոսքերը սխալ են ընկալվել ոչ ճիշտ թարգմանության պատճառով. Էդվարդ Նալբանդյան

ՌԴ ԱԳ նախարար Սերգեյ Լավրովը օրերս հայտարարել էր, որ պաշտոնական Մոսկվան ԵԱՀԿ Մինսկի խմբի այլ համանախագահների հետ պատրաստ է Լեռնային Ղարաբաղի խնդրի կարգավորման նոր առաջարկներ ներկայացնել: Նա նաև նշել էր, որ ԵԱՀԿ Մինսկի խմբի համանախագահների կողմից ներկայացված նախնական առաջարկներ կան բանակցությունների սեղանին, որոնք կողմերը չեն մերժում, բայց լրացուցիչ ջանքեր են հարկավոր սկզբունքային պայմանավորվածությունների հասնելու համար:

Այսօր` լրագրողների հետ հանդիպման ժամանակ, հարցին, թե արդյո՞ք այդ առաջարկներն արդեն ներկայացվել են, ՀՀ արտաքին գործերի նախարար Էդվարդ Նալբանդյանը պատասխանեց, թե Լավրովի խոսքերը թարգմանության պատճառով այլ կերպ են ներկայացվել: «Նա ասել էր` наработки, ձևակերպումների վերաբերյալ և այլն: Ինչո՞ւ ենք մենք հանդիպում, անցյալ տարի չորս անգամ մենք հանդիպել ենք, և դուք գիտեք, որ Վիեննայում Ադրբեջանի և Հայաստանի նախագահների հանդիպումից հետո արտգործնախարարներին հանձնարարվեց շարոնակել բանակցությունները և փորձել համաձայնության գալ սկզբունքների շուրջ: Իսկ սկզբունքների շուրջ ո՞նց ենք համաձայնության գալու առանց մեկ կամ մյուս կողմից կամ եռանախագահների կողմից, այսպես կոչված, наработка-ի: Սա բնական է, աշխատանքային գործընթաց է, բայց նոր առաջարկների մասին չէ խոսքը»: