Արարատում ընդերքի պահպանման և օգտագործման կանոնները խախտելու դեպք է արձանագրվել

Մամուլում շրջանառվող տեղեկությունների համաձայն` բնապահպանության նախարարությունն օրենքի հետ կապված խնդիրներ ունի:

Yerkir.am-ին ՀՀ գլխավոր դատախազությունից հայտնեցին, որ քրական գործ է հարուցվել Արարատի մարզում` ՀՀ քրեական օրենսգրքի 291 հոդվածի հատկանիշներով (Ընդերքի պահպանման և օգտագործման կանոնները խախտելը): Գործի նախաքննությունը վարում է Արարատի մարզի դատախազությունը: Թե կոնկրետ ինչ գործի մասին է խոսքը, դատախազությունը ձեռնպահ մնաց հրապարակելուց` նախաքննության գաղտնիությունից ելնելով:

Նշենք, որ «Ընդերքի մասին» ՀՀ օրենքի 5-րդ հոդվածի համաձայն` ընդերքի օգտագործման եւ պահպանության պետական կառավարումն իրականացնում են Հայաստանի Հանրապետության կառավարությունը եւ տվյալ բնագավառում ՀՀ կառավարության լիազորած պետական կառավարման մարմինները (բնապահպանության նախարարությունը)՝ ՀՀ օրենսդրությամբ սահմանված կարգով: