Ակտիվիստները ''քֆուրներով բարի գիշեր'' մաղթեցին պատգամավորներին

Այսօր երեկոյան ԱԺ-ի` Կարեն Դեմիրճյան փողոցի մուտքի մոտ թեժ էր. հայ-ռուսական միջկառավարական համաձայնագրերի վավերացման  դեմ բողոքող ակտիվիստները հավաքվել էին այնտեղ աշխատանքային օրվա վերջում իրենց ձեւով` հայհոյանքներով «բարի գիշեր»  մաղթելու պատգամավորներին, հատկապես` նրանց, ովքեր կողմ կլինեն այդ համաձայնագրերի վավերացմանը:

«Բոզեր», «ստրուկներ», «դավաճաններ» վանկարկումներով նրանք դիմավորում ու ճանապարհում էին ԱԺ տարածքից դուրս եկող ցանկացած ավտոմեքենայի: Բողոքի ակցիայի ընթացքում, ի դեպ, Պռոշյան փողոցով դեպի նախագահական նստավայր էր վերադառնում նաեւ նախագահի ավտոշարասյունը, ամենայն հավանականությամբ` դատարկ, բայց ակտիվիստներն իրենց հայհոյանքներից այդ ավտոշարասյանն էլ բաժին հանեցին...

Հիշեցնենք, որ կառավարության նախաձեռնությամբ ԱԺ-ում հրավիրվել է  արտահերթ նստաշրջան' վավերացնելու համար մի շարք օրինագծեր ու ՀՀ եւ ՌԴ կառավարությունների միջեւ կնքված միջպետական երեք համաձայնագրեր' գազի գնի, «Հայռուսգազարդ»-ի վաճառքի եւ այլնի վերաբերյալ: Ակտիվիստները բողոքում են հենց այդ համաձայնագրերի վավերացման դեմ' դրանց կողմ քվեարկողներին համարելով պետական ու ազգային դավաճաններ...

Քանի որ համաձայնագրերի վավերացման քվեարկությունը հետաձգվեց, ակտիվիստներն էլ ցրվեցին, բայց խոստացան վերադառնալ քվեարկության ժամանակ:

Մանրամասն' տեսանյութում