Ես ինձ համար պարզեցի ևս մեկ պատվիրատուի, ով նստած է ԱԺ-ում. Հովիկ Աբրահամյան

ԱԺ արտահերթ նիստում «Ժառանգություն» խմբակցության ղեկավար Զարուհի Փոստանջյանի ելույթն այսօր բարկացրեց ԱԺ նախագահ Հովիկ Աբրահամյանին, ով հանդես եկավ արտահերթ ելույթով: ԱԺ նախագահը նշեց, որ ինքն իրականում հորդորել է իր գործընկերներին, որ կողմ քվեարկեն օրենքին, բայց որոշ պատգամավորներ զբաղված էին բամբասանքով ու տեղյակ չեն եղել դրա մասին:

Ինչ վերաբերում է ձկնարդյունաբերության ոլորտում իր ունեցած բիզնեսին, նա նշեց, որ օրենքը թույլ է տալիս պատգամավորին բիզնես կառավարել, և եթե ինքը ունենար բիզնես, ապա չէր ամաչի դրա մասին հայտարարել:

«Բայց քաղաքական դաշտում որոշ քաղաքական գործիչներ զբաղված են` պատվերներ տալով իմ դեմ: Ես ինձ համար պարզեցի ևս մեկ պատվիրատուի, ով նստած է այս դահլիճում ու տարածում է բազմաթիվ հերյուրանքներ, թե ես ձկնարդյունաբերությամբ եմ զբաղված: Ամոթ է, թող այդ մարդիկ զբաղվեն իրենց ընտանիքով ու երեխաների դաստիարակությամբ, դա հարիր չէ պատգամավորին: Միայն խոսում եք, գործով ապացուցեք»,- ասաց Հովիկ Աբրահամյանը:

Նա խորհուրդ տվեց իր դեմ մամուլով պատվերներ իջեցնողներին` այդ գումարը ծախսել ոչ թե «մի քանի լրագրողի հաստավիզ դարձնելու ուղղությամբ», այլ բարեգործական նպատակներով: