4000-ից ավելի քաղաքացիներ նամակով դիմել է Սերժ Սարգսյանին

Արդեն տեղեկացրել ենք, որ կենսաթոշակային պարտադիր կուտակային համակարգի ներդրմանը դեմ ՀՀ քաղաքացիները նամակով պատրաստվում էին դիմել ՀՀ նախագահ Սերժ Սարգսյանին: Նամակը, որի տակ ստորագրել է 4194 քաղաքացի, արդեն հանձնվել է նախագահի նստավայր:

Նամակը ստորագրել են «Օրանժ Արմենիա» ՓԲԸ-ի, «Սինոփսիս Արմենիա» ՓԲԸ-ի, «Թումո»-ի, «Անելիք բանկ», ԵՊՀ-ի եւ այլ հիմնարկների աշխատակիցներ: Նամակի հեղինակները համարում են, որ կենսաթոշակային համակարգի պարտադիր բաղադրիչի կիրառումը ժամանակավրեպ է և խիստ ռիսկային, խնդրում են պարտադիր բաղադրիչը փոխարինել կամավորով (ինչպես արվում է շատ ժողովրդավարական երկրներում) և անցկացնել հանրային լայն քննարկումներ՝ համապատասխան մասնագետների և շահագրգիռ կողմերի մասնակցությամբ: «Մենք սիրում և ցանկանում ենք շենացնել մեր երկիրն ու պետությունը, որը ոչ թե ժառանգություն ենք ստացել մեր ծնողներից, այլ պարտքով ենք վերցրել մեր երեխաներից»,- ասված է նամակի վերջում: