Օրենքի կիրառումը հղի է լուրջ հետևանքներով. Նաիրա Զոհրաբյան

ԱԺ-ում շարունակվում են կուտակային կենսաթոշակային համակարգը հետաձգելու մասին քննարկումները:

ԱԺ ԲՀԿ խմբակցության քարտուղար Նաիրա Զոհրաբյանը նշեց, որ Հայաստանում կենսաթոշակային համակարգն ունի ռեֆորմների անհրաժեշտություն, սակայն հարցի արժեքը մեկն է` այն կառավարությունը կարող է գնալ այդ ռեֆորմներին, որն ունի հանրության վստահությունը, իսկ այս կառավարությունը, պատգամավորի խոսքով, չունի այդ հեղինակությունը:

Ըստ նրա` դրա ապացույցը նաեւ այն է, որ այս տարիների ընթացքում քաղաքացիները չօգտվեցին կամավոր համակարգից:

«Քաղաքացին ցանկանում է արժանավայել թոշակ ստանալ, բայց կա տոտալ անվստահություն այս կառավարության հանդեպ: ԲՀԿ-ն կողմ է, որ հետաձգվի նախագիծը, կազմակերպվեն լրջագույն քննարկումներ այս օրենքի շուրջ և դրվի համաժողովրդական հարցման: Կառավարության հանդեպ զրոյական վստահության պայմաններում նման օրենքի կիրառումը հղի է լինելու լրջագույն կործանարար հետևանքներով»,- ասաց Նաիրա Զոհրաբյանը: