Կրթավճարների փոխհատուցման վկայագրեր են ստացել 280 սիրիահայ ուսանողներ

Այսօր՝ հոկտեմբերի 7-ին, 280 սիրիահայ ուսանողներ ստացան 2013-2014 ուսումնական տարվա կրթավճարների փոխհատուցման վկայագրեր: Հանձնման հանդիսավոր արարողությունը տեղի է ունեցել Հայաստանի սփյուռքի նախարարությունում:

Կրթավճարների փոխհատուցումն իրականացվում է ՀՀ կառավարության, Հայկական բարեգործական ընդհանուր միության (ՀԲԸՄ) եւ «Գալուստ Կյուլպենկյան» հիմնարկության համատեղ ջանքերով. տեղեկացնում է Սփյուռքի նախարարության մամուլի ծառայությունը: Ողջունելով սիրիահայ ուսանողությանը` ՀՀ սփյուռքի նախարար Հրանուշ Հակոբյանը կոչ արեց լավ սովորել եւ ձեռքբերած գիտելիքները ծառայեցնել Հայաստանում, հանուն Հայրենիքի բարգավաճման: Շնորհակալություն հայտնելով ՀՀ նախագահ Սերժ Սարգսյանին՝ ՀՀ սփյուռքի նախարարությանը սիրիահայության հանդեպ պետական մշտական հոգածության համար` ՀԲԸՄ կենտրոնական վարչության անդամ Վազգեն Յակուբյանը նշեց, որ ուսանողների վարձավճարների փոխհատուցումն իրենց պարտքն է, պարտականությունը, որ կատարում են սիրով:

Ողջույնի խոսքով հանդես եկավ «Գալուստ Կյուլպենկյան» հիմնարկության ներկայացուցիչը: Շնորհակալություն հայտնելով ՀՀ կառավարությանը` հանձին ՀՀ սփյուռքի նախարարության, ինչպես նաեւ բարեգործական կազմակերպություններին` ուսանողներ Ալեքսան Քալաջը, Հովիկ Քեշիշյանը, Հակոբ Հրեշտակյանը եւ ուրիշները խոստացան իրենց աշխատանքով եւ նվիրումով բարձր պահել պետության հեղինակությունը: