ՄԱԿ-ի փորձագետները Ադրբեջանին կոչ են անում հանգիստ թողնել քաղաքացիական հասարակությանը

ՄԱԿ-ի` մարդու իրավունքների պաշտպանության ոլորտի փորձագետները Ադրբեջանի իշխանություններին կոչ են արել հոկտեմբերի 9-ին կայանալիք նախագահական ընտրությունների նախաշեմին ապահովել իրավապաշտպանների բնականոն աշխատանքը և քաղաքացիական հասարակության գործունեությունը. այս մասին գրված է ՄԱԿ-ի` Turan գործակալությանն ուղարկված մամլո հաղորդագրության մեջ:

Փորձագետներն ահազանգում են, որ Ադրբեջանում ստեղծվել է մի իրավիճակ, որը խանգարում է իրավապաշտպանների և քաղաքացիական ակտիվիստների գործունեությանը: 

2012 թվականին փոփոխված` «Հանրահավաքների ազատության մասին» օրենքը, ըստ ՄԱԿ-ի փորձագետների, ավելի է խստացրել հավաքների ու խաղաղ ցույցերի անցկացման կարգը: Փորձագետներն անհանգստություն են հայտնել նաև լրագրողների նկատմամբ կիրառվող հետապնդումների կապակցությամբ և ադրբեջանական իշխանությանը կոչ արել ապաքրեականացնել զրպարտանքը: