Ի՞նչ էր ՕԵԿ-ը մեկ ժամ քննարկում Կոստանյանի հետ

Շատ հետաքրքիր հանդիպում էր. գլխավոր դատախազի թեկնածու Գեւորգ Կոստանյանի հետ մոտ մեկ ժամ տեւած հանդիպումից հետո հայտարարեց ՕԵԿ խմբակցության քարտուղար Մհեր Շահգելդյանը:

«Քննարկվեցին երեք տիպի խնդիրներ, նախեւառաջ` մոտեցումները եւ տեսլականները տվյալ ոլորտի, դատախազության զարգացման հիմնախնդիրները: Երկրորդ խնդիրը` ԱԺ-ի հետ օրենսդրական գործունեության ընթացքում համագործակցության մոտեցումները: Երրորդ խնդիրը` արդարադատության ոլորտում մարդկանց հետ աշխատանքի հիմնահարցերը»,- ասաց ՕԵԿ խմբակցության քարտուղարը:

Yerkir.am-ի դիտարկմանը, որ ՕԵԿ-ի դիրքորոշումը պարզ եւ հստակ է բոլորի համար, ինչո՞ւ հանդիպումը շուրջ մեկ ժամ տեւեց, Շահգելդյանը արձագանքեց, որ երկար չէր, նորմալ եւ աշխատանքային քննարկում էր: Հարցին` ՕԵԿ-ը կո՞ղմ, թե՞ դեմ է քվեարկելու, պատասխանեց, որ այդ մասին կհայտարարվի ԱԺ նիստում: