"Հ1"-ում կրճատում չէ` ազատում է. "Հրապարակ"

Երեկ ԱԺ-ում հանդես գալու տհաճությունն այնքան է նյարդայնացրել Հանրային հեռուստաընկերության եւ ռադիոյի նախագահ Ռուբեն Ջաղինյանին, որ նա հրաժարվել է զրուցել լրագրողների հետ: ԱԺ նիստի առաջին ընդմիջումից հետո նա ապաստանել էր ՀՀԿ տիկնանց՝ Հերմինե Նաղդալյանի եւ Ռուզաննա Մուրադյանի թիկունքում ու արագ քայլերով իրեն գցել նրանց աշխատասենյակ:

«Հրապարակ»-ի լրագրողին հաջողվել է այդ վազքի ընթացքում մի քանի հարց հնչեցնել: Մասնավորապես՝ թե նոր եթերաշրջանում ինչ բնույթի հաղորդումներ են սպասվում, եւ ԱԺ-ում հնչեցված քննադատությունն արդյո՞ք հաշվի կառնվի, ու եթերը կմաքրվի՞ սերիալներից: Ջաղինյանը պատասխանել է` կլինեն այնպիսի հաղորդումներ, ինչպիսիք դուք եք ցանկանում, նաեւ խոստացել է փակագծերը բացել օրերս: Որոշ տեղեկություններով` վերջերս Հանրայինում կադրային ջարդ է իրականացվել: «Նման բան չկա, պարզապես որոշ ազատումներ են եղել»,- ասել է նա: