''Արծվաբերդ''-ի երկրորդ ծնունդը` Շուշիում

Երեկ երեկոյան` սեպտեմբերի 1-ին,  Շուշիում Անդրեյ Բաբաևի «Արծվաբերդ» օպերայի արցախյան պրեմիերայով մեկնարկեցին Արցախի Անկախության օրվան նվիրված միջոցառումները:

Ռեալական ուսումնարանի բացօթյա տարածքը, որտեղ տեղի էր ունենում բեմելը, վերածվել էր մեծ օպերային թատրոնի: Նոր մեկնաբանությամբ, լուսային հարուստ լուծումներով հագեցած ներկայացման բեմադրող անձնակազմն ամեն ինչ արել էր, որ «Արծվաբերդ»-ի պրեմերան իսկական տոն դառնա հազարավոր ներկաների և, հատկապես, Շուշիի բնակիչների համար:

Բեմադրող ռեժիսոր Ժիրայր Դադասյանի նորարարական մոտեցումներն ու լուծումները  նոր շունչ էին հաղորդել  դեռևս 1957 թ. գրված ստեղծագործությանը: Հատկանշական է, որ օպերայի առաջին բեմադրությունից հետո, որ կայացել էր  Երևանի Ալեքսանդր Սպենդիարյանի անվան օպերայի և բալետի ազգային ակադեմիական թատրոնում 1957թ.նոյեմբերի 3-ին, այն իր երկրորդ ծնունդն ունեցավ հեղինակի հայրենի օրրանում` ազատ և անկախ Արցախի արծվանիստ Շուշիում:

Արցախյան պրեմիերային ներկա հազարավոր հանդիսականների շարքերում էին հայտնի մտավորականներ, քաղաքական և պետական գործիչներ, հյուրեր, ովքեր եկել էին ունկնդրելու Անդրեյ Բաբաևի անզուգական երաժշտությունը և միասին նշելու Արցախի Հանրապետության  անկախության տոնը: 

Լուսանկարները` Արցախի նախագահի կայքից