Թուրք հովիվը վիրավորվել է ռուս սահմանապահների հետ փոխհրաձգության ժամանակ

Հայ-թուրքական սահմանն ապօրինաբար հատած թուրք հովիվը վիրավորվել է ռուս սահմանապահների կողմից փոխհրաձգության ժամանակ:

ИТАР-ТАСС-ին Հայաստանում ՌԴ Անվտանգության դաշնային ծառայության սահմանապահ վարչության մամուլի ծառայության ղեկավար Սերգեյ Գրեչինը հայտնել է, որ, նախնական տվյալներով, 35-ամյա թուրք հովիվը խախտել է Հայաստանի սահմանը, մի քանի կրակոցներ արձակել Հայաստանի սահմանը պաշտպանող ռուս սահմանապահների ուղղությամբ, ապա փորձել է  խորանալ ՀՀ տարածքը: Ռուս սահմանապահները պատասխան կրակ են բացել եւ վիրավորել սահմանախախտին: Հայաստանում ՌԴ Անվտանգության դաշնային ծառայության սահմանապահ վարչությունը հետաքննում է կատարվածը:

Մինչդեռ թուրքական լրատվամիջոցները գրում են, թե հովիվը Հայաստանի սահմանը խախտել է` հոտի հետեւից գնալով, վիրավորվել է ու հետագայում մահացել:

Հիշեցնենք, որ Հայաստանի պետական սահմանը Թուրքիայի եւ Իրանի հետ պաշտպանում են ռուս սահմանապահները: