Կարեն Անդրեասյանի նամակն ընդունվել է ՌԴ օմբուդսմենի կողմից

Ռուսաստանի Դաշնության մարդու իրավունքների հարցերով լիազոր Վլադիմիր Լուկինը դեռևս չի պատասխանել Հայաստանի օմբուդսմեն Կարեն Անդրեասյանի նամակին: Այս մասին yerkir.am-ի հետ զրույցում ասաց Մարդու իրավունքների պաշտպանի ինստիտուտի  իրավական վերլուծության վարչության պետ Արամ Վարդևանյանը:

Սակայն, նրա խոսքով, Ռուսաստանի պաշտպանի աշխատակազմի ներկայացուցիչն իրենց տեղեկացրել է, որ այն ընդունվել է ՌԴ օմբուդսմենի կողմից  և մոտ ժամանակներս նամակին պատասխան կտրվի:

Հիշեցնենք, որ երեկ Կարեն Անդրեասյանը  պաշտոնապես դիմել էր իր Ռուսաստանի գործընկերոջը՝ Հրաչյա Հարությունյանի արժանապատվության և այլ իրավունքների պաշտպանության խնդրանքով: Նա խնդրել էր Լուկինին` ուսումնասիրել Հ. Հարությունյանի նկատմամբ նվաստացնող վերաբերմունքի ու նման տեսքով դատարան բերման ենթարկելու պատճառները, ինչպես նաև իրենց լիազորությունների շրջանակներում նախաձեռնել գործողություններ՝ ուղղված Հայաստանի Հանրապետության քաղաքացի Հրաչյա Հարությունյանին օգնություն տրամադրելուն: