Նոյեմբերյանում վիրավորված Հրաչյա Սարգսյանն արդեն վերականգնողական փուլում է

Այսօր ՀՀ ՊՆ Երեւանի կայազորի կենտրոնական զինվորական հոսպիտալի պետ, փոխգնդապետ Արամ Ասատուրյանը տեղեկություններ հայտնեց Նոյեմբերյանի տարածաշրջանում տեղակայված զորամասում մայիսի 15-ին արտակարգ միջադեպի հետեւանքով վիրավորված ժամկետային զինծառայող Հրաչյա Սարգսյանի առողջական վիճակի մասին:

Հոսպիտալի պետի խոսքերով` Հրաչյա Սարգսյանը տեղափոխվել է բաժին, արդեն բավականին արագ վերականգնվում է:

«Բավականին լուրջ աշխատանք ենք կատարել. արագ վերականգնվում է, շփվում է այնպես, ինչպես իրար հետ ենք շփվում: Այսօրվա վիճակում քննարկել ենք նրա համար Կարմիր խաչի հետ համագործակցելու եւ նրան Կարմիր խաչ տեղափոխելու  մասին` զուտ վերականգնողական նկատառումներից ելնելով: Նա այլեւս բուժման կարիք չունի, զուտ վերականգնողական խնդիրներ կան»,- պատմեց Ա. Ասատուրյանը:

Նա տեղեկացրեց նաեւ, որ Հրաչյա Սարգսյանը վերականգնվելուց հետո այլեւս ի վիճակի չի լինի շարունակել զինվորական ծառայությունը:

Հիշեցնենք, որ միջադեպի հետեւանքով զոհվել էր ժամկետային զինծառայող, Մարտունու շրջանի Վերին Գետաշեն գյուղի բնակիչ, 1994թ. ծնված ԼյուքսՍտեփանյանը եւ ծանր վիրավորվել էր ժամկետային զինծառայող, Արմավիրի մարզի Մրգաշատ գյուղի բնակիչ, 1994թ. ծնված ՀրաչյաՍարգսյանը: