Ինչո՞ւ հանրապետականները գործուղման չեն

ԵԽԽՎ մոնիթորինգի հանձնաժողովի կողմից կազմակերպված «Սառեցված հակամարտություններ» թեմայով լսումներին Հայաստանից մասնակցում են միայն ԲՀԿ-ական Նաիրա Զոհրաբյանը, «Ժառանգություն»-ից՝ Զարուհի Փոստանջյանը, ՀՅԴ-ից՝ Արմեն Ռուստամյանը: Իշխանական թևն այդպես էլ ԵԽԽՎ հայաստանյան պատվիրակությունից որևէ պատգամավորի չի գործուղել Էստոնիայի մայրաքաղաք Տալինում անցկացվող լսումներին: Մինչդեռ տրամաբանությունը հուշում է, որ առաջին հերթին հենց իշխանությունները պետք է շահագրգռված լինեին միջազգային ամբիոններում ԼՂ խնդրի կարգավորման գործընթացի մասին իրենց տեսակետը հայտնել' պաշտպանելով հայկական կողմի շահը: 

ՀՀԿ-ական աղբյուրներից «Ժողովուրդ»-ը տեղեկացել է, որ իշխանական պատգամավորների' ԵԽԽՎ լսումներին չմասնակցելը պատահական չէ. այս շաբաթ ԱԺ-ում քննարկվեց ու քվեարկվեց ՀՀ կառավարության ծրագիրը: Եվ իշխանությունները ստիպված են եղել իրենց թիմին պահել Երևանում' կոճակ սեղմելու համար: Այլապես անհասկանալի է' ինչու են իշխանությունները տարատեսակ անիմաստ միջոցառումների պատվիրակություններ գործուղում, իսկ նման կարևոր տեղեր' ոչ: