Շրջակա միջավայրին պատճառված վնասները վերականգնվել են

Իրանի Իսլամական Հանրապետության քաղաքացի Բասիրատ Բասմենջ Սեյեդմորտազան 2013թ. մայիսի 5-ին Մեղրի-Երևան միջպետական ավտոճանապարհի 76-րդ կիլոմետրում` Կապան քաղաքի մերձակայքում, թույլ էր տվել ճանապարհային երթևեկության կանոնների խախտում:

Վթարի հետևանքով նրա վարած ավտոմեքենան կողաշրջվել էր, իսկ ավտոցիստեռնում եղած ժավելի խտահեղուկը` թափվել ճանապարհամերձ հողատարածք և Ողջի գետը: Հաշվի առնելով հանրության հետաքրքրությունը` ՀՀ գլխավոր դատախազությունը տեղեկացնում է, որ, մասնագետների գնահատմամբ, ճանապարհամերձ հողատարածքի, Ողջի գետի աղտոտման և ձկների ոչնչացման հետևանքով շրջակա միջավայրին պատճառված վնասի չափը կազմել է 4.235.000 ՀՀ դրամ, որը դատախազական ներգործության միջոցներ ձեռնարկելու արդյունքում ամբողջությամբ վերականգնվել է: