Միայն թե չհիասթափվեք, միայն թե մեղավոր չփնտրեք. Րաֆֆի Հովհաննիսյան

«Ժառանգության» ղեկավար Րաֆֆի Հովհաննիսյանն այսօր «Անի պլազա» հյուանոցում հավաքված իր համախոհներին հայտարարեց, որ իրենք ստեղծել են նոր Հայաստանի քաղաքացիական ազգային շարժում:

Նրա խոսքով`  պետք է հետևողական քայլերով ձևավորել կազմակերպված ժողովրդական միավորումներ, Սփյուռքում և  Հայաստանում ստեղծել նմանատիպ խմբեր, կառույցներ: «Պայքարը լինելու է բազմակողմանի, ցանկացած միջազգայի ամբիոնից ժողովրդի ձայնը պետք է լսվի»,- հայտարարեց նա:

Հովհաննիսյանը կոչ արեց հավաքվածներին իրար չքարկոծել և չհիասթափվել: «Ժողովրդի պայքարը դեռ ավարտված չէ, ամեն մի քայլ պետք է ճշգրիտ հաշվարկված լինի, Ժողովուրդը կասեր՝ յոթ չափել, մեկ կտրել: Սա պետք է լինի մեր հետագա գործողությունների հիմքը»,- ասաց նա և հավելեց, որ չպետք է երբեք վարչակարգը փոխել արյամբ:

«Միայն թե չհիասթափվեք, միայն թե մեղավոր չփնտրեք»,- հորդորեց նա` հերթական անգամ հավելելով, որ իրենք պահանջում են Սերժ Սարգսյանի հրաժարականը:

Ապրիլի 22-27-ը նախատեսվում են մարզային ժողովներ, իսկ մայիսի 9-ին` հանրահավաք Ազատության հրապարակում: