ՍԴ-ից այլ որոշում չէինք սպասում. Ռուբեն Հակոբյան

Սահմանադրական դատարանից այլ որոշում չէինք էլ սպասում. yerkir.am-ի հետ զրույցում նշեց ԱԺ «Ժառանգություն» խմբակցության ղեկավար Ռուբեն Հակոբյանը` անդրադառնալով ՍԴ-ի որոշմանը, ըստ որի` մերժվեց ՀՀ նախագահի նախկին թեկնածուներ Րաֆֆի Հովհաննիսյանի և Անդրիաս Ղուկասյանի հայցերով միասնական գործը:

Ըստ Հակոբյանի` արձանագրվեց այն, ինչ ենթադրում էր բնակչության մեծամասնությունը:

«Ինչ վերաբերում է մեր հաջորդ քայլին, ապա այդ մասին դեռ կորոշենք, քանի որ օրենքն իր գործառույթներով փակեց մեր ճանապարհը: Սակայն ՍԴ որոշումով չի կարող ավարտվել այս շարժումը: Մենք, դիմելով ՍԴ, կարծում էինք, որ գուցե իշխանությունները կփոխեն իրենց կարծիքը` ընտրությունների ընթացքի հետ կապված»,- ասաց նա` հավելելով, որ ՍԴ-ն իրավական միակ հարթությունն էր, որի միջոցով հնարավոր էր ձայների վերահաշվարկ կատարել կամ էլ երկրորդ փուլ անցկացնել:

Հակոբյանը նշեց, որ այդ որոշումն իրենց համար անակնկալ չէր եւ իրենք շարժման ամբողջ վեկտորը ՍԴ չէին տեղափոխել: