Թուրք ընդդիմադիրները պահանջում են հայ ներգաղթյալների հարցը քննարկել խորհրդարանում

Թուրքիայի ընդդիմադիր Ժողովրդա-հանրապետական կուսակցությունը հանդես է եկել նախաձեռնությամբ` պահանջելով խորհրդարանական լսումներ հրավիրել հայ ներգաղթյալների խնդիրները ուսումնասիրելու եւ դրանց լուծում տալու համար. տեղեկացնում է Anadolu գործակալությունը:

Առաջարկը գրավոր ուղարկվել է խորհրդարանի նախագահին, փաստաթուղթը ստորագրել են Ստամբուլի փոխքաղաքապետը եւ նրա կուսակիցները:

Պարզաբանելով, թե ինչու են անհրաժեշտ լսումները, նրանք գրում են, որ ներգաղթյալները Թուրքիայում բնակվում են ծանր պայմաններում, որոնք հաճախ մահվան են հանգեցնում, եւ բերում են Նարինե Մկրտչյանի ինքնասպանության օրինակը:

Հիշատակվում է նաեւ Թուրքիայի վարչապետ Էրդողանի` 2010-ին արած հայտարարությունը, թե Թուրքիայում մոտ 100 հազար հայ` ոչ քաղաքացի է բնակվում: «Կառավարությունը, որն իրեն չի զսպում հայ ներգաղթյալների փաստը որպես հաղթաթուղթ կիրառել, պետք է իրեն նաեւ չզսպի նրանց կյանքի պայմանները բարելավելու հարցում»,- ասվում է հայտարարության մեջ: