Սերժ Սարգսյանի այցելությունից ժողովրդի փորը չի կշտանա. Գալուստ Սահակյան

ԱԺ ՀՀԿ խմբակցության ղեկավար Գալուստ Սահակյանից այսօր լրագրողները հետաքրքրվեցին, թե որքանո՞վ է իրատեսական, որ Սերժ Սարգսյանը կայցելի հացադուլ հայտարարած Րաֆֆի Հովհաննիսյանին:

«PR-ի տեսանկյունից շատ լավ բան է, բայց երիտասարդական ռոմատիկայի մեջ է: Կայցելի, թե չի այցելի՝ չեմ կարծում, որ ժողովրդի փորը դրանից կկշտանա»,- հայտարարեց Սահակյանը:

Նա ընդգծեց նաեւ, որ չէր ցանկանա, որ Րաֆֆի Հովհաննիսյանը հացադուլ աներ: «Մենք թշնամիներ չենք: ՀՀԿ-ն երբեք թշնամիներ չի որոնել եւ չի որոնելու»,-վստահեցրեց Սահակյանը:

Նա նաեւ հայտարարեց, որ թեեւ չի ուզում կրակի վրա բենզին լցնել, բայց այս ամենում սադրանք է տեսնում,մյուս կողմից՝ չի ցանկանում որեւէ մեկին կոնկրետ մեղադրել:

Ի դեպ, եթե Րաֆֆի Հովհաննիսյանի հացադուլին միջամտելու անհրաժեշտություն լինի, ապա Գալուստ Սահկայանը նրան կայցելի: