Մանկական կեր վաճառած դեղատունը փակվել է

Արմավիրի մարզի Առատաշեն գյուղում նորածիններ Մերի եւ Մարիամ Վարդանյանների մահվանից հետո ժամանակավորպես փակվել է Էջմիածնի պոլիկլինիկայի մոտ գործող դեղատունը, որտեղից նրա ծնողները գնել են «Նեստլե» ընկերության «Նեստոժեն» մանկական կերը: Այս մասին news.am-ի թղթակցի հետ զրույցում ասել է Առատաշեն համայնքի ղեկավար Վահրամ Հարությունյանը:

Սակայն, թե տվյալ դեղատնից, թե «Նեստոժեն»-ի ներկայացուցչությունից նորածինների հարազատների հետ ոչ ոք չի հանդիպել: «Բայց տվյալ դեղատունը փակ է: Դռան վրա փակցված է, որ ստուգումներ են»,- փոխանցել է գյուղապետը եւ ավելացրեց, մահվան գործով վերջնական արդյունքները դեռ պարզ չեն:

Ավելի վաղ ինֆորմացիա էր հրապարկվել, որ նորածին Մերի եւ Մարիամ Վարդանյանները մինչեւ մահանալը շատ առողջ են եղել:  Նորածինների ծնողները 4 տարի է, ինչ ամուսնացած են եւ ունեին երեք աղջիկ: Մեծ աղջիկը արդեն 3 տարեկան է: Ընտանիքը սոցիալապես անապահով է եւ հիմնականում գյուղատնտեսությամբ են զբաղվում: