Սահակաշվիլին բաց նամակով դիմել է խորհրդարանին

Վրաստանի նախագահ Միխեիլ Սահակաշվիլին բաց նամակով այսօր դիմել է երկրի խորհրդարանին. տեղեկացնում  է apsny.ge-ն:

Նա նախ իր հարգանքն է հայտել ժողովրդի կողմից ընտրված խորհրդարանին, ապա ընդգծել, որ Վրաստանի Սահմանադրությունը գերագույն օրենքն է, որի կատարումը պետք է լինի յուրաքանչյուր քաղաքացու, առաջին հերթին` երկրի ղեկավարության պարտականությունը:

«Այդ իսկ պատճառով պահանջում ենք ապահովել Սահմանադրության կատարումը, որը մի կողմից պարտավորեցնում է պետության առաջին դեմքին խորհրդարանի ամբիոնից դիմել օրենսդրական մարմնի ներկայացուցիչներին եւ հասարակությանը, իսկ մյուս կողմից` պարտավորեցնում է խորհրդարանին` լսել Վրաստանի նախագահին: Համարում ենք, որ տվյալ նորմի կատարման դեպքում մենք կկարողանանք խուսափել բազմաթիվ բարդություններից, որոնք ի հայտ են եկել վերջերս: Վրաստանի նախագահը Սահմանադրության պաշտպանության երաշխավորն է, իսկ դրա կատարման պատասխանատվությունն ընկած է նաեւ խորհրդարանի վրա»,- ասվում է նախագահի աշխատակազմի տարածած նամակում:

Հիշեցնենք, որ Վրաստանի խորհրդարանական մեծամասնությունը որոշել էր, որ երկրի նախագահը չի կարող իր ամենամյա ելույթը ներկայացնել խորհրդարանին: Սահակաշվիլիի ելույթը խորհրդարանում նախատեսված էր փետրվարի 8-ին: