Գոմեշի մսի գործով նոր ձերբակալվածներ կան

Բանակի պարենային պահեստում ստուգումների արդյունքում գոմեշի մսի հայտնաբերման փաստով փետրվարի 20-ին ձերբակալվել են ևս երկուսը՝ N զորամասի հրամանատարի նյութատեխնիկական ապահովման գծով տեղակալը և նույն զորամասի պարենային պահեստարանի պետը: Նրանց մեղադրանք է առաջադրվել ՀՀ քրեական օրենսգրքի 376-րդ հոդվածով (անփույթ վերաբերմունքը ծառայության նկատմամբ):

Տեղեկությունը yerkir.am-ի թղթակցի հետ զրույցում հաստատեց ՊՆ քննչական ծառայության ավագ սպա Մերի Սարգսյանը` հավելելով, որ առայժմ անուններ չեն կարող հրապարակել:

Հիշեցնենք, որ 2012թ. հունիսին բանակի պարենային պահեստում ստուգումների արդյունքում հայտնաբերված խախտումների հիման վրա պաշտպանության նախարարության քննչական ծառայությունում հարուցվել էր քրեական գործ՝ ՀՀ քրեական օրենսգրքի 178-րդ հոդվածի 3-րդ մասի 1-ի կետի հատկանիշներով: Նախկինում որպես մեղադրյալ ներգրավվել էր նաև Կապանի մսի կոմբինատի նախկին տնօրեն Ալբերտ Օհանջանյանը։