Ալասանիան մարտին կայցելի Հայաստան եւ Ադրբեջան

Վրաստանի պաշտպանության նախարար Իրակլի Ալասանիան մարտին կայցելի Հայաստան եւ Ադրբեջան: Նախարարը լրագրողներին հայտնել է, որ այցերի ընթացքում քննարկելու է տարածաշրջանային անվտանգությանը վերաբերող հարցեր. տեղեկացնում են վրացական ԶԼՄ-ները:

Նրա խոսքերով` մեկ երկիրը չի կարող ապահովել տարածաշրջանային անվտանգություն, հարկավոր է կիրառել համագործակցության բոլոր ձեւաչափերը, եւ Վրաստանն այդ առումով առաջատարներից է լինելու:

Բացի այդ` Ալասանիան հայտարարել է, որ վարչապետ Բիձինա Իվանիշվիլիի գլխավորած պատվիրակության կազմում այցելելու է նաեւ Թուրքիա, որտեղ, միջպետական հարաբերություններից զատ, քննարկվելու է նաեւ երկու երկրների պաշտպանության նախարարությունների համագործակցության հարցը: