Պահանջում են ազատ արձակել ԷՏԱ-ի անդամներին

Այս օրերին Բասկերի երկրում ցույցեր են անցկացվում` ի պաշտպանություն ահաբեկչական ԷՏԱ կազմակերպության բանտարկված անդամների, որոնց թիվը մոտ 500 է: Նրանց մի մասը ցմահ ազատազրկված է սպանությունների համար, մյուս մասն էլ` որոշակի ժամկետով` ահաբեկչական գործողությունների մասնակցելու համար:

Ցուցարարները, որոնց թվում են նաեւ բասկ մտավորականության ներկայացուցիչներ, համարում են, որ տարածաշրջանում խաղաղություն հաստատելու համար անհրաժեշտ է բուժել հին վերքերը, հետեւաբար` հարկ է ներում շնորհել ահաբեկիչներին, առաջին հերթին` նրանց, ովքեր տառապում են հիվանդություններից: Առավել եւս` որ ԷՏԱ-ն պաշտոնապես հրաժարվել է բռնությունից: 

ԷՏԱ-ի անդամների գործերը վերանայելու պահանջով հանդես է եկել նաեւ Բասկերի ազգային կուսակցությունից կազմված տարածաշրջանային վարչակազմը: Ընդ որում` պահանջն ուղղված է ոչ միայն Իսպանիայի կենտրոնական իշխանություններին, այլ նաեւ բանտարկյալներին եւ բասկ հասարակությանը. տեղեկացնում է «Ազատություն» ռադիոկայանի ռուսաստանյան ծառայությունը: