Բազմահազարանոց երթ դեպի Իսլամաբադ

Պակիստանցի քարոզիչ Թահիրուլ Քվադրին քայլերթ է կազմակերպել դեպի Իսլամաբադ` պահանջելով ընտրությունների նախաշեմին արմատական բարեփոխումներ իրականացնել. տեղեկացնում է Al Jazeera-ն: Երթին, որը սկսվել է երեկ Լահոր քաղաքից, արդեն 7 հազար մարդ է միացել: Նրանք մայրաքաղաք են գնում ավտոբուսներով, ավտոմեքենաներով, բեռնատարներով: Քաղաքներով ու գյուղերով անցնելիս նրանց նորանոր մարդիկ կմիանան:

Քվադրին, ով երկար տարիներ ապրել է Կանադայում եւ Պակիստան է վերադարձել 2012 թվականի դեկտեմբերին, հայտարարել է, որ մտադիր է գլխավորել միլիոնավոր մարդկանց «խաղաղ հեղափոխության ճանապարհին»: Նա մեղադրում է իշխանություններին կոռուպացված եւ անգործունակ լինելու մեջ եւ պահանջում է մինչեւ 2013 թվականի մարտի ընտրությունները փոխել ընտրական համակարգը:

10 հազար ոստիկան հսկելու են ցուցարարներին երթի ողջ ընթացքում, իսկ Քվադրիին պաշտպանելու են էլիտար հատուկ ջոկատայինները: Այսօր երթը հասնելու է Իսլամաբադ: Փակ են դպրոցները, ձեռնարկությունները եւ պետական հիմնարկները: Իշխանությունները վախենում են ցուցարարների վրա թալիբների հարձակումից: