Տիմոշենկոն քաղաքացիական անհնազանդության ակցիա է սկսել

Ուկրաինական ընդդիմության` 7 տարվա ազատազրկման դատապարտված առաջնորդ Յուլիա Տիմոշենկոն հայտարարել է, որ սկսում է քաղաքացիական անհնազանդության անձնական ակցիա: Այդ կապակցությամբ նա բաց նամակ է հղել, որն այսօր ճեպազրույցում ընթերցել է Տիմոշենկոյի փաստաբան, խորհրդարանի պատգամավոր Սերգեյ Վլասենկոն. տեղեկացնում է ИТАР-ТАСС-ը:

Նամակում Ուկրաինայի նախկին վարչապետը հայտարարում է, որ հրաժարվում է շփվել դատախազների եւ քննիչների հետ, ցուցմունքներ տալ, նաեւ ինքնակամ դատարան չի ներկայանալու, որն անվանել է «ինկվիզիտորական»: «Ես դիմադրելու եմ, որքան ուժերս ներեն»,- ընդգծել է Տիմոշենկոն` հավելելով, որ այլեւ թույլ չի տա, որ խուզարկեն իրեն ու իր իրերը, նաեւ այլեւս չի վերադառնա հիվանդասենյակ, քանի դեռ այնտեղ տեղադրված են տեսախցիկներ:

Վլասենկոյի խոսքերով` ներկայումս Տիմոշենկոն փաստաբանների հետ հանդիպման սենյակում է, որտեղ բժշկական թախտ կա: