Ղազախստանը կանցնի լատինատառ այբուբենի եւ կխոսի անգլերեն

Ղազախստանի նախագահ Նուրսուլթան Նազարբաեւը հայտարարել է, որ մինչեւ 2025 թվականը ղազախական այբուբենում կիրառվելու են լատինական տառերը. տեղեկացնում է РБК-ն:

«Մենք հետագայում էլ հետեւողականորեն կիրագործենք պետական լեզվի զարգացմանն ուղղված միջոցառումներ»,- ասել է նա` ղազախ ժողովրդին ուղղված ուղերձում:

Նախագահը նշել է, որ առաջնահերթ է համարում ղազախերենը ժամանակակից տեղեկատվության լեզու դարձնելը: Ներկայումս ղազախերենը ռուսերենին հավասար կիրառվում է պետական հաստատություններում, սակայն արդեն 12 տարի անց, ըստ Նազարբաեւի, «ղազախերենը կդառնա համատարած շփման լեզու»:

Միաժամանակ, Նազարբաեւը կոչ է արել ակնածանքով վերաբերվել ռուսերենին, քանի որ այդ լեզվի միջոցով են իրենց մտել համաշխարհային մշակույթ եւ գիտություն: Նաեւ կոչ է արել մեծ թռիչք կատարել անգլերենի ուսումնասիրման գործում, ինչը լայն հնարավորություններ կբացի:

Ղազախ պաշտոնյաների կարծիքով` լատինատառ այբուբեն ունենալը կօգնի հանրապետության բնակիչներին ավելի հեշտ սովորել անգլերենը, իսկ օտարազգիներին` ղազախերենը: Ներկայումս լատինատառ այբուբենից օգտվում են որոշ ղազախական արտասահմանյան համայնքներ, մասնավորապես ` Թուրքիայում: Կորեայում եւ այլ երկրներում բնակվող ղազախները կիրառում են արաբական գիրը: