Եզդի ամբաստանյալը հոգեկան հիվա՞նդ է

Կենտրոն և Նորք-Մարաշ ընդհանուր իրավասության դատարանում, Մխիթար Պապոյանի նախագահությամբ, շարունակվեց Արտուշ Հակոբյանի, Քյարամ Ամոյանի, Դավիթ Գալստյանի, Արման Դալաքյանի, Արթուր Մանուկյանի, Սամվել Դավթյանի գործով դատական հերթական նիստը: Ամբաստանյալները մեղադրվում են մի շարք պաշտոնական անձանց բնակարաններում ավազակային հարձակումներ կատարելու մեջ:

Ամբաստանյալ Քյարամ Ամոյանի պաշտպանը միջնորդեց, որպեսզի Ամոյանը ենթարկվի դատհոգեբուժական-դատահոգեբանական փորձաքննության` հայտարարելով, որ իր պաշտպանյալն ունի ներքին տագնապ եւ վախի զգացողություն. տարբեր բուժհիմնարկներից տրված փաստաթղթերի հիման վրա եզրակացրել են ուղեղի ոչ բավարար աշխատանքի մասին: Պաշտպանը գտնում է, որ  փորձաքննության ընթացքում պետք է պարզել՝ արդյո՞ք ուղեղի աշխատանքի խանգարումն ազդել է Քյարամ Ամոյանի հոգեկանի վրա,  արդյո՞ք նա ճիշտ է ներկայացնում իրավիճակը, թե՞ ներկայացնում է այնպես, ինչպես դիմացիններին է անհրաժեշտ և, ի վերջո, նա հոգեկան հիվա՞նդ է, թե՞ ոչ:

Դատարանը հետաձգեց այդ միջնորդությունը՝ գտնելով, որ բուժզննման փաստաթուղթը ձեռք բերելուց հետո հնարավոր է անդրադառնալ միջնորդությանը: Պաշտպանական կողմը ակնարկել էր նաեւ, որ իրավասու կարող է լինել առողջապահության նախարարության միջգերատեսչական մարմինը: Միջնորդությունից հետո ցուցմունքներ տվեցին տուժողները:

Հիշեցնենք, որ նախորդ նիստը հետաձգվել էր ամբաստանյալ Արման Դալլաքյանի վիրահատության պատճառով: