Դիպլոմների գները տարբեր են

ԿԳ նախարարությունն անցած շաբաթվա ընթացքում հանրապետության 3 բուհերի ուսանողներից ստացել է բողոք-դիմումներ` դիպլոմ տալու դիմաց գումար պահանջելու վերաբերյալ:

ՀՀ ԿԳ նախարարության բարձրագույն կրթության վարչության պետ Ռոբերտ Սուքիասյանը Աղվերանում ԿԳՆ-ի կողմից անցկացված եռօրյա սեմինարի ժամանակ նշեց, որ ԿԳՆ-ն առաջիկայում հանդիպում է կազմակերպելու բուհերի ներկայացուցիչների հետ` վերոնշյալ հարցի հետ կապված քննարկում անցկացնելու նպատակով:

«Տրամաբանական չէ, թե ինչո՞վ է պայմանավորված, որ բուհերում դիպլոմի համար գումարի չափն անգամ հաստատուն չէ` չնայած հանգամանքին, որ այն պետք է ընդհանրապես անվճար տրվի ուսանողին: Պատրաստվում ենք հարցը տեղափոխել իրավական դաշտ»,- ասաց Ռ. Սուքիասյանը: