Միքայել Մինասյանը գնում է Հովիկ Աբրահամյանին օգնելու

Քիչ առաջ հրաժարական ներկայացրած` նախագահի աշխատակազմի ղեկավարի տեղակալ Միքայել Մինասյանը News.am-ին տված հարցազրույցում նշել է, որ իր հրաժարականն անսպասելի չէր, եւ ինքը գնում է օգնելու Հովիկ Աբրահամյանին` գալիք ընտրությունները պատշաճ նախապատրաստելու:

«Հանրապետության նախագահը տրամադրված է լավագույն ընտրությունների անցկացման: Մենք պատրաստվում ենք ոչ միայն ապահովել նախագահի կուսակցության հաղթանակը գալիք ընտրություններում, այլեւ նպաստել այնպիսի ընտրությունների անցկացմանը, որից Հայաստանը դուրս կգա ուժեղացած եւ վստահորեն դեպի ապագա նայող: Իսկ դրա համար այսօր արդեն ստեղծված են բոլոր անհրաժեշտ պայմանները:  Կարծում եմ, որ այս ընտրությունները որակական հեղափոխություն են լինելու մեր երկրի ու բոլորիս համար»,- ասել է նա:

Անդրադառնալով հարցին, թե  արդյոք սրանով կավարտվի՞ պաշտոնաթողությունների շղթան, Միքայել Մինասյանը պատասխանել է, որ նման հարցերի պատասխանը գիտի միայն մեկ մարդ` հանրապետության նախագահը: