Դանակահարություն` Արարատի մարզի զորամասերից մեկում

Արարատի մարզի զորամասերից մեկում ժամկետային զինծառայող Գարեգին Լալայանը դանակահարել է ծառայակցին` Հայկ Գարեգինյանին. տեղեկացնում են Հայաստանի ՊՆ քննչական ծառայության հասարակայնության հետ կապերի բաժնից:

Զինծառայողների միջեւ նախօրեին վիճաբանություն է եղել: Վեճի ժամանակ Լալայանը սվին-դանակով հարվածել է Գարեգինյանի մեջքին` պատճառելով չթափանցող մարմնական վնասվածքներ:

Փաստի առթիվ քննչական ծառայության 8-րդ կայազորային բաժնում հարուցվել է քրեական գործ` քր.օր.-ի 359 հոդվածի 2-րդ մասի 3-րդ կետի հատկանիշներով (Զինծառայողների փոխհարաբերությունների կանոնագրքային կանոնները խախտելը նրանց միջեւ ստորադասության հարաբերությունների բացակայության դեպքում, որն առաջացրել է ծանր հետեւանքներ):

Հայկ Գարեգինյանին տեղափոխել են զորամասի բուժկետ:

Իսկ նրան դանակահարած Գարեգին Լալայանը զորակոչվել էր 2009թ. աշնանը եւ մի քանի շաբաթից պետք է զորացրվեր: Եթե նրա մեղքը դատարանով հաստատվի, զինծառայող Լալայանը 4-8 տարի կանցկացնի բանտում: