ԱԶԳ. Հրազդանցիների երթը դեպի երկաթահանք

Երեկ կեսօրին Կոտայքի մարզի Հրազդան քաղաքի Սահմանադրության հրապարակից մեկնարկեց բնապահպանական երթ դեպի Հրազդանի երկաթի հանքավայր:

«Ազգին» երթի կազմակերպիչները հայտնեցին, որ այս ակցիայի նպատակն է ծանոթանալ երկաթահանքում տեղի ունեցող ներկայիս գործընթացներին եւ հանքը շահագործել նախապատրաստողներին փոխանցել Հրազդանի ազգաբնակչության մտահոգությունները:

Ներկայումս Հրազդանի երկաթահանքում չինական Fortune Oil ընկերության կողմից իրականացվում են երկրաբանահետազոտական աշխատանքներ:  «Հանքի շահագործումը կվատթարացնի Հրազդանի էկոլոգիական վիճակը, ինչպես նաեւ կաղտոտվեն հանքավայրից 600-700 մետր հեռավորության վրա գտնվող խմելու ջրի աղբյուրները: Հենց այդ աղբյուրներն են ապահովում ոչ միայն Հրազդանի, այլեւ Երեւանի խմելու ջուրը»,- նշում էին ակցիայի մասնակիցները: