Չինաստանն ու Վիետնամը կհամագործակցեն ռազմական ոլորտում

Չինաստանի եւ Վիետնամի իշխանությունները համաձայնագիր են ստորագրել երկու երկրների միջեւ ռազմական համագործակցությունն ավելի խորացնելու մասին:

Reuters-ը հաղորդում է, որ «ուղիղ» կապ է հաստատվել պաշտպանության երկու նախարարների միջեւ, եւ նպատակը երկու երկրների միջեւ եղած լարվածությունը մեղմելն է: Պայմանագրի համաձայն` նախատեսվում է նաեւ համատեղ պարեկություն իրականացնել սահմանին:

Իսկ անցյալ շաբաթ այս երկու երկրները համաձայնագիր էին կնքել վիճելի տարածքի հարցը խաղաղ ճանապարհով լուծելու վերաբերյալ: Խոսքը վերաբերում է Հարավչինական ծովի բնական ռեսուրսների շահագործմանը: Ծովը հարուստ է նավթի եւ գազի պաշարներով, ինչն էլ վեճի առարկա է դարձել նաեւ Թայվանի, Մալայզիայի եւ Ֆիլիպինների համար: