Խաղաղության Նոբելյան մրցանակն էլ գտավ իր տերերին

Այսօր Նոբելյան հանձնաժողովը Օսլոյում ներկայացրեց 2011թ. Խաղաղության Նոբելյան մրցանակի 3 կին դափնեկիրներին` Լիբերիայի նախագահ Էլեն Ջոնսոնին, Լիբերիայի «Հանուն խաղաղության կանանց շարժման» ակտիվիստ Լեյմահ Գբովիին, ինչպես նաև եմենցի իրավապաշտպան, «Լրագրողներ առանց շղթաների» կազմակերպության ղեկավար Թավաքել Կարմանին:

Նոր Աֆրիկայի խորհրդանիշը համարվող 72-ամյա Էլեն Ջոնսոն Սիրլիֆը Լիբերիայի առաջին կին նախագահն է։ Մի քանի օր անց այդ երկրում նոր նախագահական ընտրություններ են անցկացվելու, եւ նա այս անգամ եւս պայքարելու է նախագահի պաշտոնի համար։

Մրցանակը երեք կանանց շնորհվել է  «կանանց անվտանգության եւ խաղաղ կարգավորման գործընթացներին լիարժեքորեն մասնակցելու իրավունք ունենալու` ոչ բռնի պայքարի համար» ձևակերպումով: