Խորհրդային ժամանակներից մնացած ժառանգություն

Այսօր մեկնարկել է ՀՀ ԿԳ նախարարության եւ ԵԱՀԿ երևանյան գրասենյակի հետ համատեղ կազմակերպված եռօրյա ուսուցողական սեմինարը` նվիրված բուհերում հակակոռուպցիոն ռազմավարությունների և գործողությունների ծրագրերի մեխանիզմներին:

Կոռուպցիան մեզ խորհրդային ժամանակներից մնացած ժառանգություն է. yerkir.am-ի հետ զրույցում ասաց Երեւանի Կոմիտասի անվան պետական կոնսերվատորիայի պրոռեկտոր Ռուբեն Տերտերյանը: Նա համարում է, որ եթե ընդհանուր ուսումնական գործընթացը ճիշտ ուղղությամբ գնա, տեղ չի մնա կոռուպցիայի համար:

Նշենք, որ հակակոռուպցիոն ծրագրերի քննարկման ժամանակ ԿԳ նախարար Արմեն Աշոտյանը նշեց, որ կոռուպցիոն ռիսկերի նվազեցումը կնպաստի կրթության որակի բարձրացմանը. «Շատ կարեւոր են հակակոռուպցիոն ռազմավարությունների ծրագրերը. ծրագրեր, որոնց միջոցով հնարավոր է պայքարել կրթական ոլորտում կոռուպցիայի դեմ, ունենալ դրական արդյունքներ` բարձրացնելով կրթության որակը»: