Էլ ինչի՞ց կարելի է պրոթեզ ստանալ

Ջրիմուռները հումք կդառնան պրոթեզների պատրաստման համար: Ըստ ավստրալացի գիտնականների` նոր տեխնոլոգիան հնարավորություն կտան էապես նվազեցնել այն բարդությունների առաջացման հավանականությունը, որոնք կապված են, օրինակ, կոնքազդրային հոդերի կամ սրտի փականների պրոթեզավորումից հետո վարակի զարգացման հետ. տեղեկացնում է Doctors.am-ը:

Բավարար կլինի միայն փոխպատվաստվող մասի մակերևույթը պատել այնպիսի նյութով, որը ստացվում է Delisea pulchra ծովային ջրիմուռից: Ինչպես բացահայտել են Սիդնեյի աչքի հետազոտության և տեխնոլոգիաների կենտրոնի գիտնականները, այդ նյութը, որը ստացել է ֆուրանոններ անվանումը, 90 տոկոսով վերացրել է էպիդերմալ ստաֆիլոկոկը, որով պատված է եղել պլաստիկե մակերևույթը: Նրանք նաև ցուցաբերել են բարձր ակտիվություն ոսկեգույն ստաֆիլոկոկի դեմ, ներառյալ` դրա մետիցիլինակայուն շտամների դեմ, որոնք մեծ խնդիր են բժշկության մեջ: