Զգուշացե՛ք, երեխաներ են

ՃՈ-ն սեպտեմբերի 1-ից 10-օրյա ժամկետով իրականացնելու է ծրագիր` «Զգուշացե՛ք, երեխաներ են» խորագրով: Ինչպես հայտնեց ՃՈ ճանապարհապարեկային ծառայության բաժնի պետ Նորիկ Սարգսյանը, տասնօրյակի ընթացքում ՃՈ աշխատակազմն աշխատելու է հատուկ աշխատանքային գրաֆիկով:

«Մեր կողմից ամեն ինչ արվելու է, որպեսզի տասնօրյակն ամփոփենք առանց երեխաների հետ տեղի ունեցած ճանապարհատրանսպորտային պատահարների»,- հավաստիացրեց Սարգսյանը:

Նա ծնողներին և ուսուցիչներին կոչ արեց դպրոց նոր հաճախող երեխաներին սովորեցնել ճանապարհն անցնելու կանոնները: «Բոլոր դպրոցներում արդեն կա ճանապարհային երթևեկության տարրական կանոնների ուսուցման 10-ժամյա պարտադիր ծրագիր»,- հավելեց նա:

Սարգսյանը հիշեցրեց նաև, որ նախորդ տարի նույն շրջանում ՀՀ-ում գրանցվել է 6 ճանապարհատրանսպորտային պատահար: «Դրանց հետևանքով զոհվել է 1 և վիրավորվել 6 երեխա»,- տեղեկացրեց բանախոսը` հույս հայտնելով, որ դասերի սկսման ժամային փոփոխությունը դպրոցներում և բուհերում կտա իր դրական արդյունքը: