ԱԶԳ. Կարող ես պարտքով գումար տալ. երեխաս գնում է դպրոց

Այս արտահայտությունն այս օրերին կարելի է լսել ամենուր:

Վաղը սեպտեմբերի 1-ն է` ոմանց համար տոն, ավելի շատերի համար` հոգսեր: Դպրոցահասակ երեխայի համար այս օրերին կոշիկ կարելի է գնել 4 հազար դրամով, վերնազգեստ` 3 հազարով, պայուսակ` 4 հազարով, գրենական պիտույք` 3 հազարով, այս բոլոր թվերը նվազագույնն են: Եթե հավելենք նաեւ այլ ծախսեր, որոնք հաստատապես լինում են, ու ընդունենք դրանց համար նվազագույնը 3 հազար դրամ, ապա երեխային դպրոց ճանապարհելու համար` միայն այս ամենը ապահովելով, ծնողը ծախսում է 17 հազար դրամ:

Իսկ եթե երեխան առաջին դասարանցի է, այսինքն` նրան տանը անհրաժեշտ են նաեւ գրասեղան, առաջին դասարանցիների համար «խիստ նորաձեւ» դարձած բջջային հեռախոս, ապա` գրասեղանի համար վճարելով նվազագույնը 25 հազար եւ բջջայինի համար նվազագույնը 13 հազար դրամ, դուք ծախսում եք ուղիղ 55 հազար դրամ: