Երիկամ` ուսման վարձի փոխարեն

Անգլիական Դանդիի համալսարանի բժիշկ Սյու Ռեբիթ Ռոֆը ֆինանսական խնդիրներ ունեցող ուսանողներին առաջարկել է վաճառել իրենց երիկամները` համալսարանի վարձը վճարելու համար: Նրա կարծիքով` երիկամի համար ուսանողը կստանա 28 000 ֆունտ, որը հավասար է բրիտանացիների միջին տարեկան եկամուտին. տեղեկացնում է doctors.am-ը:

Բրիտանական բժշկական ասոցիացիան դատապարտել է բժշկին: Համաձայն Մեծ Բրիտանիայի դոնորության ակտի` օրգանի դիմաց գումար ստանալն անօրինական է: Հետապնդվում է նաև օրգան գնելու կամ վաճառելու փորձը:

Ինչպես հայտարարում են միության ներկայացուցիչները, դոնորությունը պետք է կատարվի կամավորության սկզբունքով եւ բժշկական անհրաժեշտության դեպքում: Բացի այդ` կենդանի դոնորից երիկամ վերցնելը որոշակի ռիսկ է պարունակում, իսկ ֆինանսական շահագրգռությունը կարող է մարդկանց չմտածված քայլերի դրդել:

Ռոֆի խոսքերով` երիկամի փոխպատվաստման իր հերթին սպասելով` յուրաքանչյուր օր մահանում է երեք մարդ: Իսկ նվիրատվությունների քանակը համապատասխան չէ անհրաժեշտ օրգանների քանակին: